venerdì 16 novembre 2018

23 Novembre. Casteddu Speaks Sardu #8



Venerdì 23 Novembre 2018 (stasera) dalle ore 19:00 alle ore 23:00
Caffè Dettori – Fun Page
Via Napoli 75 a, Cagliari
Saludi a totus,

Casteddu est una citadi ispantosa, una mexina po is ogus e po su coru chi perou, a dolu mannu, est perdendi, comenti totu s'isula nosta, una parti de importu de sa bellesa cosa sua, su Sardu.

Difatis, sa citadi bessit dònnia dii sèmpiri prus italòfona aundi su Sardu parit de moda sceti po donai nòminis a tzilleris o a sa cosa de pappai (nudda de mali) ma candu si intrat in sa parti prus manna de custus logus, chistionai sa lìngua sarda abarrat ancora unu tabù, una cosa de bècius e de macus. 


Insandus, est cun praxeri mannu chi si invitaus a Casteddu Speaks Sardu, s'àtobiu de ciaciarradas in lìngua sarda po totu is Sardus e is stràngius chi bivint innoi e bolint chistionai apitzus de cosas meda bufendi-sì una birrixedda e fueddendi (assumancu nci provaus) in sa lingua de s'Isula nosta.

Cun custu àtobiu informali eus a agiudai sa promotzioni de custa lìngua aici de importu po sa cultura e po tenni unu benidori lìberu de discriminatzionis linguìsticas in Casteddu e in totu sa Sardìnnia.

In s'atòbiu funt beni bènnius is fueddadoris de totu is bariedadis de su Sardu e de is àteras minorias linguìsticas de sa Sardinnìa, una cosa sceti chi si pedeus est de tenni arrespetu e tolleràntzia po chini tenit parris diferentis apitzus de sa chistioni linguìstica Sarda.

S'abetaus in medas e spereus chi custu potzat essi sa primu de bortas meda aundi nos'agataus po promovi sa lìngua e sa cultura Sarda in sa citadi de Casteddu.

Sa bregùngia est a NO ddu fueddai.

Unu Saludu mannu a totus !



Nessun commento:

Posta un commento